Plantun de Prouvènço

Pèr coumpara dos planto d'encò nostre

Stachys recta & Plumbago europaea

Tè-blanc

Stachys recta

Lamiaceae Labiaceae

Àutri noum : Tè-de-mountagno, Tè-de-Ventour.

Nom en français : Epiaire droite.

Descripcioun :
Lou tè-blanc vo de-mountagno es uno betounico coumuno que trachis dins li colo roucassouso e li tepiero seco. Se recounèis à si flour jauno tacado de poupro, bèn poulideto. Fai de mato flaco, soun port èi pulèu dre, èi peludo mai pas forço pamens. Coumpara emé la betounico-de-l'an qu'èi pulèu raro.

Usanço :
Coume lou dis soun noum, èro emplega coume tè, valènt-à-dire coume uno bevèndo qu'a de goust e pas trop d'usanço medicalo. O. Madon raporto : "N'en fasié de tisano, ma maire, acò lou campavian. Soi disant qu'èro un pau ... purgatiéu" (op.cit. p. 85).

Port : Pichoto planto lignouso
Taio : Pancaro entresigna
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Stachys
Famiho : Lamiaceae
Famiho classico : Labiaceae

Ordre : Lamiales

Coulour de la flour : Jauno
Petalo : irreguliero
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Colo - Basso mountagno - Roucaio
Estànci : Termoumediterran à Subaupen
Couroulougi : Pancaro entresigna
Ref. sc. : Stachys recta L., 1767

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.